Timor-Leste/KOMUNIKADU BA IMPRENSA GABINETE ZONA ESPESIAL EKONOMIA MERCADO SOSIAL TIMOR-LESTE

Dili, 24.7.2013

Leonia Monteiro

TVTL transmite notisia sala katak ba fabrika tijolo Liquisa hetan konvite atu tama iha projetu ZEESM Oecussi

Notisia neebe TVTL transmite, iha Segunda-Feira Kalan, 22 Julhu 2013 iha notisiariu katak “Diretor Tijolu Hetan Konvite Husi Mari Alkatiri”no “Produsaun Tijolu Sei Uza Ba Projeitu Master Plan Oecusse”.

Notisia nee foka mos ba Sekretariu Estadu Industria no Koperativa neebe hala’o vizita ba fatin produs Tijolu iha Distritu Likisa, no liliu reporta liafuan husi director fabrika nee nian neebe dehan:  “Ami mos konvite husi Senhor Eis Primeiru Ministru Mari Alkatiri atu bele envolve iha Master Plan iha Oekusse, iha tinan oin, tamba sira dehan programa ne’e diak.”

Tuir Eis Primieru Ministru no

responsavel maximu ba implementasaun Projetu ZEESM Oecussi, Dr. Mari Alkatiri, notisia nee la los, no TVTL tenke halo korresaun.

“Maske hau rasik halau sorumutu badak oan ida foin dadaun ho Sr Director fabrika tijolu bainhira nia mai apresenta deit sira ninia operasaun, hau la konvida sira atu tama iha porjetu ZEESM.  Ho respeitu tomak ba Sr Director nee, koalia hanesan nee sala ona.  Hau dehan katak empresa hanesan sira nee no seluk neebe iha kapasidade no meritu bele tama iha futuru bainhira tempo too mai tuir prosesu neebe sei harii tuir lei enkuadramentu ZEESM neebe sei hetan aprovasaun no pormulgasaun tuir mai.  Agora seidauk tempo atu se se deit bele dehan sira tama tiha ona.  Hau nunka dehan ida nee ba sira ka ema seluk,” deklara Dr. Mari Alkatiri iha Dili ohin.

“Maske tuir informasaun neebe hau simu husi director fundasaun fabrika tijolu, hau hare no apresia katak sira halau servisu diak tebes, no ita hotuhotu hakarak projetu hanesan nee atu haburas iha ita nia rain, nee la signifika katak hau nudar responsavel ba projetu ZEESM Oecussi, konvida tiha ona sira atu tama.  Ho respeitu tomak, nee la los,” Dr. Mari Alkatiri affirma.

Nia hatutan mos katak, TVTL tenke halo korresaun ba notisia ida nee, tamba sala, no tamba publiku tenke hetan notisia neebe los kona ba prosesu ida neebe tuir interesse nasional no importante liu ba prosesu desenvolvimentu nasional.

“Hau husu liu husi komunikadu nee ba TVTL atu por favor transmite korresaun ba notisia ida neebe sira halo transmissaun sem konfirma ho hau nia gabinete,” temik Dr. Mari Alkatiri.

Ba informasaun seluk tan ka esklaresimentu dere ba Leonia Monteiro iha 7732 6975