30 dezembro 2009/Fórum Académico http://faf-coimbra.blogspot.com
Komisaun Organizadora konvida ema hotu-hotu atu asiste programa komemorasaun tinan 31 Nicolau Lobato mate iha funu laran.
Fatin: Igreja Motael
Loron: 31 Desembru 2009
Oras: 8:00 dadersan. Hafoin missa, ita sei ba soe aifunan iha tasi, Farol nia oin
Nicolau mate iha 31 Desembru 1978 - Ninia legadu ba ita hotu
Tuir informasaun husi lideransa FRETILIN nian, Nicolau dos Reis Lobato konvoka reuniaun politiku-militar iha zona sul molok nia mate. Kuadrus FRETILIN nian no FALINTIL husi Timor-Leste tomak simu orientasaun ida neé no hahú lao ba fatin nebe Nicolau hatudu ba sira hetan malu atu haré hamutuk oinsa organiza fila fali rezisténsia hasoru forsas okupasaun indonezias.
Maibé, militar indonesiu simu mos informasaun ida neé no hahú haleu zona sul iha fatin bar´barak.
Iha 31 Desembru 1978, militar indonesiu konsege haleu grupu asuwain nebe akompanha Nicolau Lobato, entre Maubisse, Turiscai no Same.
Tuir versaun FRETILIN nian, hafoin militar indonesiu tiru Nicolau, sira tula nia (seidauk konfirma se tiru kanek todan ka tiru mate kedas) ho helikópteru mai Dili. Iha altura neba, Koronel Dading Kabualdi, komandante jeral forsas armadas indonesias nian, iha Timor-Leste, halo serimónia boot tebes ida iha Dili ba hatudu ba mundu tomak katak sira konsege ona manan funu hasoru FRETILIN tamba sira oho tiha ona lider asuwain murak Timor-Leste nian. Sira hasai fotografia kaixaun no isin Nicolau Lobato nian nebe tau iha jelu laran no haruka ba mundu tomak atu konfirma sira nia "vitória" iha Timor-Leste.
Konforme informasuan nebe FRETILIN simu ikus mai, militar indonesiu sira lori Nicolau Lobato tesi nia ulun no lori ba Jakarta hanesan sira nia "troféu" no hakoi ninia isin iha Timor-Leste.
Liu tiha tinan barak, bainhira Guilherme Gonçalves (eis-governador Tim-Tim nian) moras todan iha Portugal, nia hateten ba familia Nicolau nian katak militar indonesiu hakoi Niculao Lobato nia isin iha quintal rezidensia Komandante Forsas Armadas nian, iha Farol - uma nebe ikus mai sai rezidensia ofisial Dr. Mari Alkatiri nian, nudar Primeiru-Ministru 1º Governu Konstitusional.
Iha final 2003, bainhira konstrutor sira ké quintal rezidensia neé nian, sira hetan ruin ema nian, menus ulun fatuk. Primeiru-Ministru Alkatiri fó kedas orientasaun ba "Serious Crimes Unit" atu investiga kazu neé tamba deskonfia katak ruin neé bele pertense ba Prezidente Nicolau Lobato. Iha 2004, amostra ruin neé nian tó iha Australia no akompanha moos ho kaben, ran no fuk husi Rogério Lobato no José Lobato atu hare se material DNA husi matebian nian hanesan ho sobrevivente rua neé nian, husi familia Lobato.
Tó ohin loron "Serious Crimes Unit" / Estadu Timor-Leste sei dauk simu relatóriu konkluzivu kona ba análize forensika ba ruin nebe FRETILIN hanoin katak pertense ba Nicolau Lobato.
Konforme informasaun tó husi "The Age", Jornal australianu, polisia husi Northen Territory se kompleta análize forensika iha tinan foun mai neé.
Nicolau dos Reis Lobato luta no mate ho kilat iha liman. FRETILIN lakon oan murak ida nebe fó nia an tomak ba libertasaun povu Maubere husi kolonialismu no pobreza iha aspetu hotu-hotu.
Biar ninia mate fó impaktu boot ba ita nia Rezistensia, asuwain sira ho lideransa Xanana Gusmão nian, iha atura neba líder FRETILIN nian, hatutan nia hanoin no hahalok iha frente armada, klandestina no diplomátika.
Importante fó hanoin katak FRETILIN ho lideransa Nicolau dos Reis Lobato nian, kuda husi 1974 - 1978, espírito Unidade Nasional, konseitu povu no nasaun, no husi neé haklaken katak povu timor tenke moris ho ninia identidade rasik no ida neé ezije katak hotu-hotu tenke hamrik hamutuk atu harii nasaun Maubere. Tamba neé, movimentu libertasaun nasional haburas ba bebeik tó ita ukun rasik aan.
Ida neé mak legadu boot Nicolau dos Reis Lobato husik ba jerasaun hotu-hotu Timor-Leste nian.
Mai ita hotu hamutuk iha Igreja Motael atu reza missa ba Nicolau Lobato nia klamar no heróis hotu-hotu tuir ninia brani no determinasaun.
Nenhum comentário:
Postar um comentário