CPLP, Timor-Leste/Fretilin kritika akordu fronteira tasi nian ho Austrália tanba fó liu poder ba Canberra

24 de Julho de 2019, 21:04, Pájina aktualizada iha 22:20h, kuarta-feira 24 Jullu,

noticias.sapo.tl/tetum/info/artigo/1532394.html

Fretilin hatete katak vota kontra iha loron-tersa ne'e ba tratadu fronteira sira ho Austrália tanba konsidera katak dokumentu fó rekursu timoroan sira ba ema australianu sira ho poder hodi desidi kona-ba dezenvolvimentu hosi projetu Greater Sunrise.

"Ohin Fretilin [Frente Revolucionária do Timor Leste Independente] vota kontra rezolusaun kona-ba Tratadu hosi Fronteira Tasi tanba loke ona dalan hodi fahe rekursu sira, ho dalan gratuitu, ho ita nia viziñu. Tratadu ne'e entrega mós parte hosi ita nia soberania ba Austrália ho direitu hodi jere ita nia rikusoin, ne'ebé iha ita nia teritóriu nia laran", esplika hosi Aniceto Guterres Lopes, xefe hosi bankada Frente Revolucionária do Timor-Leste Independente (Fretilin) nian.

"Hanesan retóriku no kontraditóriu sira ne'ebé maka afirma katak ho definisaun hosi fronteira tasi ita manán soberania total, tanba tratadu hanesan fó kbiit desizaun nian ba Austrália no

fó mós ba sira 30% hosi ita nia rikusoin iha kampu Greater Sunrise”, nia afirma.

Iha loron-tersa ne'e, Fretilin mesak maka vota kontra rezolusaun hosi tratadu permanente hosi fronteira sira ho Austrália, ne'ebé aprova tiha ona - hamutuk ho pakote lejislativu ida - ho maioria ida 42 hosi deputadu na'in 65.

Repete krítika oioin ne'ebé husik ona durante debate, Fretilin kestiona liuliu aspetu sira ne'ebé iha relasaun ho posu sira Greater Sunrise nian, kaer hosi konsórsiu ida ne'ebé kontroladu maioria hosi petrolíferu timoroan Timor Gap.

"Tratadu estabelese katak bainhira gazodutu mai Timor-Leste, sei fahe 30% hosi Greater Sunrise ba Austrália. No aleinde ne'e fó kbiit ba Austrália hodi foti desizaun sira hamutuk ho Timor-Leste kona-ba oinsá dezenvolve kampu Greater Sunrise nian", nia afirma.

"Simplifika, bainhira Austrália la aseita planu dezenvolvimentu nian, ita sei labele implementa. Ne'e signifika katak ita entrega 30% gratuitu ba Austrália, no ita fó gratuitu ita nia soberania ba Austrália hodi desidi kona-ba ita nia rikusoin", nia afirma.

Partidu haree katak tratadu estabelese atu desizaun sira kona-ba dezenvolvimentu hosi posu sei foti ho baze iha planu ida ne'ebé sei dezenvolve hosi autoridade ida, ne'ebé sei iha membru na'in rua hosi Timor-Leste ho na'in ida hosi Austrália, maibé, maski maioria timoroan, desizaun sira sei bele foti de'it iha konsensu.

Nia hatete katak hanesan razaun sira ne'ebé maka Fretilin kestiona katak ne'e maka hanesan tratadu fronteira ka "tratadu ida hodi fahe rikusoin ho Austrália", dúvida ne'ebé tuir Lopes katak la iha esklaresimentu adekuadu hosi Governu.

Ezekutivu repete ona durante debate katak parte hosi posu sira Greater Sunrise nian halo parte iha bee australianu sira no nune'e maka presiza fahe reseita sira.

Partidu hatán mós ba krítika sira hosi Governu ba tratadu anterior, hodi haree katak ho testu ne'e maka permiti ona ba Timor-Leste hodi hetan reseita importante sira no, iha tempu hanesan, loke dalan ba tratadu ne'ebé maka ratifika ona iha loron-tersa ne'e.

Lopes kritika mós deklarasaun sira hosi bankada sira Governu nian kona-ba faktu hosi tratadu reprezenta konkista hosi soberania Timor-Leste nian, asaun ne'ebé nia refere ona hanesan la reflete iha partilla hosi reseita sira no hosi desizaun sira ho Austrália.

"Ita ko'alia kona-ba soberania ida ne'ebé? Oinsá ita bele ko'alia katak soberania hanesan kompletu bainhira liuhosi Tratadu ne'e ita entrega poder ba nasaun seluk hodi foti desizaun kona-ba rikusoin hosi ita nia nasaun", nia kestiona.

"Fretilin la'ós kontra fronteira tasi nian. Fretilin defende fronteira tasi nian delineadu liuhosi liña medianu. Fretilin vota kontra fahe rekursu sira no entrega soberania ne'ebé maka inklui iha tratadu ne'e", nia afirma.

Lopes konklui hodi afirma katak iha kestaun sira hanesan ne'e "diálogu hanesan dalan úniku" maski deputadu sira hosi bankada sira Governu nian "hanesan alérjiku oituan ba liafuan ne'e", hatudu disponibilidade ba "diálogu ho entidade tomak iha Timor-Leste hodi buka solusaun sira ba kestaun sira Estadu nian no ba povu".

Rekorda katak deputadu sira aprova ona rezolusaun ida hosi Governu ne'ebé ratifika tratadu - iha versaun sira ho lian portugeza ho ingleza - no konjuntu ida hosi anexu sira, inklui "Ilustrasaun hosi Fronteira Tasi sira nian", "Rejimi Espesial hosi Greater Sunrise", "Área hosi Rejimi Espesial" ho "Dispozisaun Tranzitóriu sira ho Arbitrajen".

"Rezultadu hosi akordu hanesan konsistente ho direitu internasional no parte rua konsidera aseitável ba solusaun ekuitativu ida, nune'e mós kriasaun hosi baze estável ida ho dura kleur ba atividade petrolíferu sira iha área hosi fundu mariñu sira entre Timor-Leste ho Austrália ho benefísiu sira ba parte rua", refere hosi rezolusaun ratifikasaun nian.

Rezolusaun hosi ratifikasaun aprova ho votu konkorda hamutuk 42 ho votu kontra hamutuk 23 hosi deputadu sira Fretilin nian, partidu hosi Prezidente Repúblika.

Lusa