Timor-Leste/KOMPROMISSU POLITIKU CAMARADAS LU-OLO NO MARI ALKATIRI

<!--[if gte mso 9]> Normal 0 false false false EN-US X-NONE HE MicrosoftInternetExplorer4

29 julho 2011/Fretilim Media http://www.fretilinmedia.blogspot.com

EKIPA SUSESU LU OLO - MARI ALKATIRI

KOMPROMISSU POLITIKU CAMARADAS LU-OLO NO MARI ALKATIRI

BA ELEISAUN DIREKTA LIDERANSA FRETILIN

Iha tinan 2011 loron 20 Agosto, sai loron historiku ba demokrasia iha FRETILIN nia laran. Iha loron ida ne’e militantes tomak FRETILIN nian sei hakat ba estasaun no centro votasaun iha Timor Leste laran tomak atu vota ba lideransa nebe mak sei sai mata dalan ba sira.

Nu’udar Pakete Kandidatu ba Prezidente no Sekretariu Jeral FRETILIN nian ami hakarak hato’o ami nia Kompromissu Politiku hodi hametin liu tan FRETILIN no servi diak liu tan povo Timor-Leste iha loron oin mai, wainhira militantes tomak fo fiar no vota ba ami nai rua nu’udar sira nia Prezidente no Sekretariu Jeral FRETILIN liu husi eleisaun Direta Lideransa nian.

FRETILIN nu’udar partidu responsavel ba nia militantes no povo Timor-Leste, presija lideransa nebe iha responsabilidade, integridade, kredibilidade no determinado atu bele reprezenta no sai mata dalan ba militantes tomak FRETILIN nian.

Nu’udar pakote kandidatu ba eleisaun direta lideransa FRETILIN nian, ami fiar no imi hotu hatene no hare tiha ona katak ami hatudu tiha ona ami nia responsabilidade, integridade , kredibilidade no determinado hasoru desafius barak iha tinan hirak liu ba. Ami nain rua hatudu ona ba militantes tomak FRETILIN nian katak to’o ohin loron ami hamrik metin nafatin ho militantes FRETILIN sira iha tempu defisil laran no li-liu iha krise hasoru FRETILIN iha tinan 2006.

Hahalok hirak ne’e la’os deit hatudu iha tempo krize 2006 nia laran, hafoin krize ne’e rasik mos, ami hatudu nafatin ba militantes no povo Maubere tomak katak Partidu FRETILIN nebe ami lidera iha tempo defisil ne’e bele hamrik metin fila fali, maske nune’e, ami hakarak hato’o dala ida tan ba militantes FRETILIN tomak, ami nia Kompromisu Politiku wainhira ami hetan nafatin fiar atu sai mata-dalan ba militanntes FRETILIN nu’udar Prezidente no Sekretariu Jeral FRETILIN. Ho lideransa ami nian, jovens barak, feto no mane involve ona hanesan kuadrus FRETILIN nian iha estrutura FRETILIN iha nivel hotu-hotu, ezemplu nebe sai ona hanesan transisaun ba futuru lideransa FRETILIN nian.

Ita nia Partidu FRETILIN ohin loron metin ba bebeik, ho ami nia lideransa hafoin II Congressu iha fulan Maio 2006, iha tempo susar nia laran, ami konsege lori ita nia Partidu no ita nia rain sai husi krize ida neba. Serbisu barak ita nia partidu halo seidauk to’o rohan, sei la to’o rohan, tan ita nia Partidu tenki sai hanesan referensia ba konstrusaun estadu de direitu no sai mos referensia ba povo tomak nebe mak involve iha politika hodi hadian ita nia rain.

Ita nia militantes ohin loron inskreve ona liu rihun atus ida lima nulu resin, numeru ne’e sei aumenta iha fulan hirak oin mai, sistema ne’e hola parte iha prosessu reajustamentu nebe hahu iha tinan 2007, husi Konferensia Holarua iha Distritu Manufahi. To’o ohin loron prosessu ne’e la’o nafatin atu hametin ita nia Partidu nia organizasaun. Ita halo ona konsolidasaun iha Timor-Leste laran tomak ho prezensa ami nain rua nian hodi hasoru diretamente ho kuadrus no militantes sira. Ita nia sede FRETILIN sai ona fatin ba ita hotu ho nia kultura institusional rasik hodi produz lider FRETILIN sira atu ukun Timor-Leste, sede CCF sai fatin ba kuadrus sira atu aprende politika no doutrina lolos oinsa ukun Timor- Leste ho responsabilidade. Atu komunika diretamente ho militantes no povo Timor-Leste tomak FRETILIN, ita mos hari hikas fali Radio Maubere, Radio nebe ho nia historia rasik.

Ho serbisu hirak ne’e hotu, liu husi komprimissu politiku ida ne’e, ami hakarak hato’o ba militantes FRETILIN tomak katak wainhira camaradas sira fo nafatin fiar ba ami nain rua atu lidera camaradas sira nu’udar Prezidente no Sekretariu Jeral FRETILIN ba tinan lima oin mai, hamutuk ho Camaradas sira hotu no estruturas FRETILIN tomak to’o tinan lima oin mai , FRETILIN nebe ami lidera sei:

1. Metin liu tan hodi hasoru desafius oin-oin molok no hafoin eleisaun Prezidensial no Lejislativas iha tinan 2012;

2. Manan iha eleisaun Prezidensial no Lejislativas iha tinan 2012 hodi ukun Timor-Leste ho responsabilidade no integridade no dignidade;

3. Hametin fiar povo Timor-Leste tomak ba FRETILIN hodi lori povo Timor-Leste partisipa iha prossesu libertasaun povo husi kiak no mukit;

4. Hametin liu tan Estado de Direitu Timor-Leste hanesan Estado nebe soberano no independente;

5. Hametin estruturas FRETILIN iha nivel baze to’o nivel central liu husi programas Formasaun Politika nebe sistematiku;

6. Kria kondisaun diak liu ba joventude Feto Mane atu involve iha FRETILIN hodi hametin liu tan FRETILIN;

7. Reprezenta FRETILIN iha nivel internasional ho nasional ho dignidade no integridade;

8. Hametin no estabelese relasaun diak ho forsas politikas hotu-hotu inklui sosiedade sivil;

9. Hametin FRETILIN atu defende riku-soi Timor- Leste nian ho kompetensia no dignidade;

10. Halo FRETILIN atu sai Partido ho militantes konsientes no Partido ba Povu tomak.

Ikus liu, nu’udar Kandidatus ba Prezidente no Sekretariu Jeral FRETILIN, ami nia esperansa katak atu hametin no reafrima identidade FRETILIN no povo Maubere mai fo imi nia “Vota Lu-Olo nu’udar Prezidente FRETILIN no Mari Alkatiri nudar Sekretariu Jeral FRETILIN.

Viva FRETILIN

Viva Povo Maubere

Kandidatu ba Prezidente Kandidatu ba Seckretariu Jeral

Fransisco Guterres “Lu-Olo” Dr. Mari Alkatiri