Timor-Leste/Brigadeiru Lere haksolok hasoru hikas nian oan rasik

21 junho 2010/Timor Expose/Timor Lorosae Nação http://timorlorosaenacao.blogspot.com

Brigadeiru General FALINTIL-Forsa Defeza Timor Leste (F-FDTL), Lere Anan Timor, Domingo (20/06), hasoru hikas nia oan mane segundu ho naran Gunawan Adi Gunarahman, ne’ebe lakon tiha durante tinan 29.

Gunawan Adi Gunarahman, ho naran bolu Boby, ho nia inan-aman haki’ak, Idayu Astiti no General Sutomo, to’o iha Aereportu Internasional Nicolau Lobato, Comoro-Dili, ho aviaun marka Merpati-Indonesia.

Brigadeiru Lere ho nia familia tomak haksolok tebes hasoru Boby.

Boby ho nia inan-aman haki’ak tu’un husi aviaun liu husi fatin VIP no hasoru malu ho nia aman, inan ki’ik no familia sira, ho laran haksolok, mataben turuk ho emosaun, hetan osan mean ne’ebe lakon tinan naruk tebes.

Boby lakon iha Sub-Distritu Iliomar sei bebe fulan hitu, wainhira nia aman (Lere) haruka nia inan ho nia husi ai-laran ba vila, maibe la kleur rona Boby nia inan mate tamba hetan tiru husi Militar Indonesia sira, no Boby lakon kedas iha momentu ne’eba.

Brigadeiru Lere haktuir katak, iha momentu ne’eba nia rasik haruka nia fen-kaben ho nia oan fila husi ai-laran ba vila tamba tempu ne’eba difisil tebes no nia tenki halai tu’un sae ai-laran hodi kontinua funu hasoru inimigu.

Nia (Boby) sei fila-fali ba Indonesia, nia inan nain rua, aman nain rua, ne’ebe nia sei ba mai de’it. I iha tempu ruma hau sei kria kondisoens nia fila mai Timor, laos mai hela metin mas nia sei ba vizita nia inan-aman haki’ak,” hateten Brigadeiru Lere.

Boby hateten, nia sente haksolok tebes wainhira hasoru hikas nia aman ho nia familia sira, ne’ebe durante nia nunka sente katak sei haosu malu, tamba nia rasik la hatene, wainhira nia inan-aman haki’ak fo hatene ba nia, katak, nia inan-aman rasik iha Timor.

“Saya senang sekali, saya di bawah dari Dili umur 7 bulan katanya. Saya disekolahkan sampai selesai, sekaran saya Enjiner di Kapal,” haktuir Boby ba Jornalista sira iha Aereportu-Dili.

Aman haki’ak Boby hateten ba Jornalista sira, nia sente kontente tebes tamba nia konsege lori hikas Boby ho nia fen-kaben mai hasoru nia aman rasik ho nia familia sira, no bele ba hare’e nia inan nia rate.

“Tapi,,,sebentar lagi Pak Lere punya Cucu,” koalia Boby nia aman haki’ak ho mataben nakonu.

Oin sa familia rua ne’e bele hasoru malu? Aman haki’ak Boby haktuir liu katak, Brigadeiru Lere dala ida halao vizita ba iha Jakarta, maka konta historia ho General ida ne’ebe uluk komanda bataliaun iha Timor, no husu tuir tu’un sae no ikus mai hasoru Boby nia aman haki’ak, i konsege rekoinese malu hanesan aman no oan, i deside mai hasoru malu ho familia tomak iha Timor.

Boby, oin hanesan lolo’os ho nia aman Lere, no nia maun bo’ot.

“Nia (Boby) mutin tamba nia iha ema nia rai ne’e halo ema mutin duni,” tenik ho hamnasa Brigadeiru Lere, no, ho domin bo’ot familia sira haksolok tebes ho klima hasoru malu ne’e.(TE)