12 dezembro 2011/Fretilin Media http://www.fretilinmedia.blogspot.com
Sr Presidente da Republica,
Sr. Presidente Parlamento Nacional,
Representante Espesial Secretario Geral Nacoens Unidas nian,
Konvidadus, no Povu Timor-Leste tomak,
Exelensias,
Ohin ita komemora loron mundial Direitos Humanos, loron ida ne’ebe inportante ba ema mundu tomak, nune’e mos ba ita povu Timor-Leste, atu reafirma ita nia fiar ba dignidade humana no direitus fundamentais ema nian, atu hafoun kompromisu atu aumenta progresu social no hadia kualidade moris iha liberdade ne’ebe bot liu ba ema hotu.
Iha Timor-Leste, ita selebra loron direitus humanus nian iha situasaun ida ne’ebe 75% povu sei moris iha kiak no mukit nia laran, tuir relatoriu obserbasaun relatora Espesial Nasoens Unidas, konaba Pobreza extrema no direitus Hiumanus, foin lalais ne’e.
Situasaun ida ne’e obriga ita atu halo avaliasaun oinsa implementasaun ka realizasaun direitus humanus liu-liu direitus ekonomikus, sociais no kulturais, hanesan direitu ba aihan, direitu ba servisu, direitu ba edukasaun, direitu ba saude no sst, ne’ebe tuir dokumentus prinsipais internasional konaba DH nian ne’ebe ratifika ona, sai nudar obrigasaun no responsabilidade Estadu ka Governu Timor-Leste nian.
Maske dezenvolvimentu halao ona besik tinan sanulu, no Iha tinan 4 ikus ne’e Timor-Leste halo ona investimentu publiku hamutuk liu ona 3.5 biliaun dollares amerikanu, maibe laiha mudansa signifikativu. Iha seitor agrikultura ne’ebe populasaun barak liu iha areas rurais moris ba, ema barak sei sente falta aihan, sei sente falta bemos, no mais ou menus 58% populasaun sofre mal nutrisaun kronika. Kiak naklekar iha fatin hotu-hotu, no 90% joven ho idade 15 ate 34 anus mak laiha servisu atu sustenta sira nia moris. Situasaun moris populasaun area rural sira nia mak aat liu tan, tanba infraestrutura at, asesu limitadu ba informasaun no meius komunikasaun, no konsentrasaun prosesu ekonomiku iha deit Dili, nunka ba to’o base.
Kresimentu ekonomiku “doble digit” no desenvolvimentu, la dauk trtansforma ba melhoramentu padraun moris no kriasaun empregu ba ema Timor, no hamosu desigualdade social, no korupsaun moris buras iha institusoens estadu. Nune’e, ema uitoan deit mak goja moris diak durante tinan 10 ukun rasik an, ho rekursus povu nian rasik, enkuantu maioria povu Timor-leste sofre nafatin, ka la hetan direitu atu hetan moris ho digno.
Exelencias,
Iha dia 9 de Dezembru liu ba, Ita mos selebra loron mundial anti korupsaun, maibe ita selebra ho laran taridu, tanba tuir relatoriu ne’ebe foin lalais fo sai hosi Transparensia Internasional, tuir indise persepsaun korupsaun iha mundu koloka Timor-leste iha lista numeru 143 hamutuk ho nasaun Togo, Uganda, Nigeria, no sst, hosi lista 183 paizes ne’ebe hetan avaliasaun, hodi konsidera TL nudar nasaun ida ne’ebe iha risku bo’ot ba korupsaun.
Maske ita balu lakohi simu realidade ida nee’ebe ita hasoru, tanba hanesan kininu moruk ita presiza tolan atu kininu moruk ne’e bele mai hadia no atu bele mai kura ita nia moras, kura ita nia moras korupsaun ne’ebe lori dadadauk ona nia konsekuensia ba halakon maioria povu TL nia direitu atu hetan moris diak.
Kaer ba liafuan Sr Presidente da Republica ne’ebe hatudu nia preokupasaun ba korupsaun iha rai laran, iha selebrasaun loron mundial Anti Korupsaun nian iha sentru konvensaun, katak, “Timor-Leste nudar nasaun foun, foin tinan 10, tuir lolos sai nasaun ne’ebe “super limpo” no “modelo” iha luta hasoru korupsaun.”
Atu remata, ami hakarak aproveita fo parabens ba maluk sira ne’ebe ohin sei simu premiu husi Presidente da Republika. Ami hein katak ita hotu hamutuk sei respeita no garante direitus humanus, no direitus fundamentais ba sidadaun hotu-hotu iha TL, laos deit promesa mamuk iha diskursu politiku ka hakerek lei, maibe tenke sai duni realidade iha moris lorloron.
Obrigado!
Nenhum comentário:
Postar um comentário